Indonesia i fait egensim Australia tobako loa long WTO

Indonesia i joinim pinis ol narapla kantri long wold em oli memba blong World Trade Organisation (WTO) long fait egensim loa em Australia ibin kamapim long karamapim olgeta sigeret wantem pepa em nogat kala oa kaen kaen toktok long ol oa plain packaging.

Gavman blong Australia i strongim ken ol loa blong en, maski Indonesia i laik lukim sopos emi ken kotim Australia long despla pasin em ibin mekim long karamapim olgeta sigeret wantem pepa nating oa plain packaging.

Laen blong World Trade Organisation itok Indonesia i mekim pinis wanpla asikim blong oli mas toktok wantem Australia long despla wari blong ol. Aninit long loa blong WTO despla i ken min olsem bai gat heve long ol wok trade. WTO igat ol hed kuata blong en istap long Geneva, Switzerland.

Indonesia i kamap olsem namba faif kantri long bringim tingting nolaik blong ol egensim Australia long WTO bihaenim despla strongpla loa blong en egensim Tobako.

Australia i bin kamapim despla loa blong daonim na stopim ol pipal isave smuk tumas na tu blong daonim ol kaen kaen sik em simuk isave kamapim.

Wanpla tokman blong Minista blong Helt itok, Peter Dutton ino bin laik mekim wanpla toktok long despla tingting blong Indonesia long kisim Australia igo long WTO, tasol gavman itok emi sapotim tru despla loa em oli bin kamapim long 2011 na oli bin stat long bihaenim long mun Desemba 2012.

Ol narapla kantri em oli bin bringim despla wari blong ol igo long WTO em Ukraine, Honduras, Dominican Republic na Cuba.

Tripla kantri blong Honduras, Dominican Republic na Cuba itok olsem despla loa em Australia ibin kamapim i brukim ol loa blong trade em ol kantri long wold isave bihaenim long wonem emi karamapim olgeta kaen kaen samting em oli save kamapim long tobako na ino sigeret tasol.

Tasol Hai Kot blong Australia itok Australia ino brukim wanpla loa.

Bu Haber için yorum yapabilirsiniz 28.09.2013 09:31:29 204.236.235.245

Yorumlar()